如何面對2.5歲小朋友唔願食飯，原來鐘意𦧲骨？

原來小朋友每個階段，鐘意食嘅野都可以好唔同～我地做家長嘅真係唔可以一成不變，要根據每個階段配合返！尤其係食野呢方面，好多時我地都要面對一樣野，就係點解佢地唔肯食飯😩？

一開始貝貝明明係靠食粥為生，到依家見到粥嘅話可以一啖都唔肯食！

明明以前佢食白飯就好開心，依家主要肯食麵類，唔多肯食飯，多數剩係肯食餸，但食得都唔多。

以前食飯好叻，成餐飯可以由得佢自己食，食好多好多，完全唔駛擔心佢，但依家下下要三催四請，食少少就話飽，搞到我地成日驚佢唔飽，吸收唔夠，搞到要餵佢先肯食。

以前肯食好多菜，依家發現佢主動會食得多嘅只有西芹，西蘭花（仲要剩係食啲花），枝豆(好叼鑽）！

依家成日都要估佢鐘意食咩，希望佢可以食多啲野，然後最近發現佢鐘意lur骨🤡，可能覺得扮大人好型？佢本身都鐘意食雞翼嘅，然後有一次婆婆俾佢食埋雞翼尖，佢又係食得好滋味，清咗好多隻，仲話佢lur骨lur得好好！再有一次食魚，我喺佢面前挑走晒啲骨先俾佢，佢竟然要求我唔準挑，如果我就咁俾佢，佢嬲，我連埋啲骨俾佢，佢先肯食，原來佢係想自己挑骨呀，然後睇住佢逐條挑完先食！再之後有餐飯，我見佢又開始話飽，唔願食其他餸（但明明食得勁少野），突然我就醒起挑骨呢件事，於是我就問佢～

問：「你要唔要食肉肉（排骨）呀？」

貝：「（望一望咩黎）唔要」

然後我轉個方法，show d 有骨嘅俾佢睇：「咁你要唔要食bone bone🦴 呀？」

呀，佢個死女包，對眼真係即刻發光！

答：「🤤好丫！🤩」

估唔到我轉個方法問佢，佢又真係肯食，然後佢好滋味咁慢慢lon骨🤪，show off我地睇自己有幾叻！當然我地都配合返，係咁讚佢幾叻幾犀利，然後佢就食晒食淨果啲排骨😂

所以真係無時無刻要留意住小朋友嘅發展，佢地好千變萬化，佢地突然間唔鐘意食野，可能都真係有原因，好似貝貝呢個階段咁，可能佢係厭倦咗餐餐飯都差唔多野食，但依家對佢黎講，lur骨成為咗一個挑戰，咁佢又再投入返。有時我地再諗深一層，轉一轉啲想法，多啲喺佢地角度諗野，可能會有啲意外收穫！

我決定下餐飯，就煮晒啲有骨嘅野，睇下佢係咪真係會主動食返多啲先！

但唯一一樣自佢出世到依家，都未食得厭嘅野，就係飲奶！😌

－－－－－－－－－－－－－－－－－－－－－

Facbook page: 貝貝Alice-小寶貝夢遊日記

Instagram: bowl_lam