海洋公園萬豪酒店buffet～bonvoy會員7折

12月 11, 2019

海洋公園萬豪酒店buffet～bonvoy會員7折

其實我同貝爸無特別喜愛食自助餐，不過鄰近海洋公園嘅餐廳實在唔多，而且諗住萬豪酒店咁新，同埋download 個app做bonvoy會員就有7折優惠，星期一至四去折實都係$534 一個人，buffet dinner黎講呢個價錢都幾吸引！帶埋貝貝去又抵，因為未夠3歲又唔駛錢，最重要上網做過research，見到都幾多好評，一於去試試佢！

▲只要show app右上角個會員number，就可以享有7折優惠，不過唔知優惠幾時完啊，去之前記得打去問清楚！

喺海洋公園出黎，右手邊就有條電梯落去酒店，路程5分鐘都唔駛，超方便，去到再等一陣先入得，最早6:30就可以開始食啦！

當中最吸晴係清蒸龍蝦、韓牛、雪糕旋轉櫃（haagen dazs&movenpick)、花膠車仔麵、燉湯，仲有我好鐘意食嘅鵝肝！

貝媽一向都鐘意食冷盤多過熱盤，魚生同壽司都幾多選擇，款款質素都好好，特別鐘意食深海池魚，甜品都好多選擇，仲有即整可麗餅！

貝爸同我剛相反，鐘意熱盤多過冷盤，佢就覺得野食選擇唔夠多！的而且確，熱盤選擇比我食過嘅自助餐少，勝在貴精不貴多吧！

貝貝都食咗好多野，每樣都試咗啲，車仔麵、蝦、葡撻、窩夫、棉花糖、曲奇餅、士多啤梨奶凍、水果、cupcake，雪糕！開頭我仲諗住佢全日無瞓晏覺，佢會攰到食食下瞓著，等我可以專心食，點知佢全程都無瞓過，仲由頭食到落尾，好抵！

全晚最開心就係貝媽拎咗盒movenpick 雲呢拿雪糕返黎，扮蛋糕同佢吹蠟燭，嘩！佢一見到ice cream雙眼發光！！好興奮！見到蠟燭仲開心！！！已經狂唱happy birthday！最後，要等呀爸呀媽批准，唱晒歌，吹晒蠟燭先准食，等到佢勁心急😹

跟住一路食一路震晒嗌凍凍😂，但我地話：「咁唔好食啦」，貝：「no!!」跟住勁快爬咗半杯！😂最後都係頂唔順！

諗返起上年，佢仲係一舊飯，成班人圍住佢唱歌，佢都未知咩事😹但今年佢已經識得自己唱歌，知道係貝貝happy birthday，感覺好得意。