小孩識分咩係「HEA」陪？優質陪伴對孩子非常重要

12月 21, 2019

小孩識分咩係「HEA」陪？優質陪伴對孩子非常重要

話說我同貝貝戒睇youtube，已經進行咗大概2星期多吧？
以前佢每朝見我起身，或者無所事事，一停落黎或者搭車悶就會叫我開youtube俾佢睇～
但係早陣子見到佢貶眼好用力，睇電視好似好用神，對眼好攰咁，所以唔想再咁樣維持下去～
以前嘅我一樣機不離手，一停落黎就想拎住電話撳撳撳～可能有時都忽略咗貝貝～
但依家嘅我為咗貝貝，同佢玩緊嘅時候我都盡量唔拎電話，好專心好專心咁同佢玩～同佢玩完呢樣悶咗又玩過第樣～每日都同佢發掘多d好野玩，然後我終於察覺，優質嘅陪伴係令佢完全忘記youtube！已經連續好多日，佢無再特別要求我開youtube佢睇！
反而，我有時都會偷偷拎手機覆d urgent message，貝貝都即刻會搶我電話：「唔好睇，媽咪唔睇！玩～陪我～玩！」連食緊飯，都會喝我地：「唔睇，媽咪，爸爸食飯呀，唔睇呀，唔睇！食飯呀」

然後最大嘅分別，係我發現呢排貝貝係真心好愛我，好依賴我，好多時都要我陪佢。
每朝早都好期待我起身陪佢玩，明明知道我瞓緊覺，佢會不斷大叫：「good morning～morning～come come～起身～過黎呀～媽咪！」但佢又會好乖見我落床嘅話，會提我去廁所先：「媽咪～痾poo poo？」佢知道我起身要先去廁所，先可以同佢玩，咁佢就自己玩住玩具，或者吸住塵掃住地等我（以前一定係叫我開youtube先俾我去廁所）～
依家又會成日無情情捉實我個頭，同我對望～
或者有時望望下會自動嘴我～
有時會攬到我好實～然後講love you
有時會從後面攬緊我～
有時會無啦啦聞我身體嘅味道，然後話香～
我知道你好快會大個，好快會獨立，會依賴我嘅日子實在有限，所以我會繼續努力，為咗珍惜同你相處嘅時光，我會繼續俾優質嘅陪伴你架，你比任何野都重要！