石垣親子旅行2019～飛機篇

香港飛石垣全日只得一班hkexpress可以搭，無其他機揀，仲要香港時間07:40起飛！因為我地住得遠，要預返45分鐘以上車程，所以當日我地零晨4點就要起身準備，大概4點半就叫醒貝貝🙈好彩當晚佢都算早咗瞓，雖然佢都唔太想起身，扭咗一輪，但好快都進入狀態，知道有得去街街就好開心😀

不過飛石垣其實真係好方便，2小時就到，但廉航啲機真係好迫🙈我地腳長，所以幾乎要坐直先唔會頂腳～我地坐最入，中間得一條路，出入拎野都麻煩，所以最好一早預備好邊啲野要跟身，一上機就擺好啲行李就要即刻坐低，如果唔係要後面啲人等你🙈然後好彩呀貝起飛前瞓咗，一起身都已經差唔多預備落機，最怕佢喺飛機上扭黎扭去，唔肯坐定定就慘。

貝貝全程都勁興奮！

係咁講「嘩！飛機，搭飛機！」

難得的一家三口望中鏡頭笑！😊

石垣國際機場係超細嘅，比起馬里機場仲細，一個時間只處理同一班機，同埋得一條路，所以如果坐前排機位著數好多，過關條隊可以排最前面，好快就可以出到去，落咗機就搭程巴士去ots拎車，大約5分鐘就到，快過沖繩好多，拎車等咗20分鐘左右，就可以開始旅程嗱！

石垣到著！

十月中天氣都已經好清涼好大風！

OTS等車中

而石垣回程係日本時間嘅11:45，基本上食個早餐就要出發，但石垣好似無乜地方食早餐，所以通常啲人會買酒店早餐食，咁食完就check out直去機場，但今次我地就選擇早啲起身checkout酒店，之後擺晒啲行李喺車，去麥當勞食早餐🤪，就去機場！

食開心樂園餐換車仔俾貝貝，但唔知點解全部都係車頭，無車身！

因為國際線同時間都只係會處理呢一班機，所以等候check in同過關都係超快～去到機場，國內線果邊仲有齊好多手信賣，如果旅程果幾日買唔夠，可以去補貨。去到仲見到好好味果間雞蛋布丁🍮賣，俾貝貝臨走前食多次個🍮做個美好嘅總結！佢食得超開心超滿足添！

回程當日飛得仲快，原本要2小時嘅航程，當日竟然仲早咗半個鐘到，仲記得當日飛機要等跑道降落，飛機師仲喺香港上空兜咗一圈先降落，喺飛機上面望落黎睇晒成個香港真係好靚好靚，最鐘意都係香港呢個地方，我地嘅屋企❤️

模仿網紅式街拍😆

其實我地都係第1次咁早機就返到香港，雖然係浪費咗一整日旅程，但對於親子遊黎講其實幾舒服，咁早同小朋友返到香港，仲可以好悠閒咁喺機場食個午餐先搵車搭，唔洗夜媽媽返黎趕頭趕命搵車返屋企。其實去完旅行已經好攰，如果返到屋企又夜，仲要收拾行李同安頓小朋友真係攰上加攰。所以今次旅行真係去得好舒服，去完返黎都無咩攰嘅感覺，真正慢活渡假，好enjoy！

返到香港，胃口超好，差唔多自己一個食咗成碗麵

侍應叔叔姨姨行過都話佢好叻，仲叫佢得閒黎坐😜

下一篇就會開始介紹石垣第1日旅程～記得留意～😉
「石垣旅行～day1：美崎牛燒肉、入住art hotel、birthday、舟藏之里居酒屋，驚安Donki行街」

1Y10M9D&13D

——————————————

喜歡我地一家三口就follow我地啦，仲要 Set 做搶先看呀～💓

Facbook page: 貝貝Alice-小寶貝夢遊日記

Instagram: bowl_lam